Membership and Library Services

Do Leabharlann

Bíonn fáilte roimh gach duine i mbrainsí na Leabharlainne Poiblí. Ní gá duit a bheith i do bhall chun leabhair, nuachtáin nó irisí a léamh, chun úsáid a bhaint as na spásanna staidéir, chun cuairt a thabhairt ar thaispeántais ná chun freastal ar imeachtaí a eagraítear sa Leabharlann. Ach is gá duit a bheith i do bhall chun leabhair nó nithe eile a fháil ar iasacht ó na Leabharlanna.

Cén chaoi ar féidir liom ballraíocht a fháil?

Teastóidh cineál éigin aitheantais uait ar a dtaispeántar do sheoladh reatha mar shampla ceadúnas tiomána, bille leictreachais nó leabhar oifig an phoist chun ballraíocht a fháil. Teastóidh ó thuismitheoir nó ó chaomhnóir daoine óga (faoi bhun sé bliana d'aois) a ainm nó a hainm a chur ar an bhfoirm iarratais.

Céard a d'fhéadfainn a fháil ar iasacht?

Is féidir le baill suas le dhá ní dhéag a fháil ar iasacht san iarraidh, lena n-áirítear leabhair, dlúthdhioscaí, DVDanna, leabhair thaifeadta agus cluichí ríomhaireachta. Is féidir sean-eagráin d'irisí a fháil ar iasacht chomh maith.

Cén t-achar ar féidir liom ábhar ón Leabharlann a choinneáil?

Is 21 lá an tréimhse choitianta iasachta. Is féidir an tréimhse sin a fhadú áfach ach glaoch, seasamh ag do leabharlann áitiúil, nó dul isteach ar an suíomh gréasáin. Is féidir nithe nach bhfuil curtha in áirithe ag iasachtóir eile a athnuachan cúig huaire déag. Is féidir iasachtaí fadaithe a eagrú do bhaill a mbíonn riachtanais speisialta acu; tá breis eolais le fáil ag do bhrainse áitiúil ach é a iarraidh.

Cén chaoi a ndéanfaidh mé nithe a athnuachan?

Tá trí bhealach ann chun nithe a athnuachan: bualadh isteach chuig an mbrainse, ar an bhfón nó ar líne. Beidh foireann na Leabharlainne sásta do thicéad a sheiceáil ach sin a iarraidh ag do bhrainse áitiúil. Moltar duit d'iasachtaí a thabhairt cothrom le dáta gach uair a bhuaileann tú isteach chuig do leabharlann.

Is féidir leat chomh maith glaoch ar CHEANN AR BITH de leabharlanna brainse Dhún Laoghaire-Ráth an Dúin chun do chuntas a sheiceáil. Bíodh do chárta leabharlainne faoi do láimh agat, le do thoil, mar iarrfar ort an uimhir ballraíochta atá air a thabhairt.

Chun iasacht a athnuachan ar líne, téigh isteach ar www.dlrcoco.ie/library agus cliceáil ar an nasc cuí. Iarrfar ort d'uimhir iasachtóra a chur isteach (is í seo an uimhir atá os cionn an bharrachóid ar do chárta). Teastóidh uimhir aitheantais phearsanta uait chomh maith; ní thabharfar an uimhir seo duit ach amháin nuair a bhuailfidh tú isteach chuig do leabharlann áitiúil; is ar mhaithe le slándáil a dhéantar sin.

Má bhíonn fadhbanna ar bith agat do chuntas a fháil ar líne, téigh i dteagmháil le do thoil le ceann de na leabharlanna brainse.

An ngearrtar táillí ar bith?

Tá ballraíocht na leabharlainne saor in aisce agus ní ghearrtar táillí ach amháin i gcás go mbeadh nithe atá ar iasacht ón leabharlann thar téarma nó i gcás go gcuirfí ní in áirithe.

ticéid do dhaoine fásta: 70c an ní in aghaidh na seachtaine nó cuid de sheachtain.
ticéid do leanaí: 55c an ní in aghaidh na seachtaine nó cuid de sheachtain.
ní (nithe) a chur in áirithe: 50c in aghaidh an ní

Chun fíneálacha a sheachaint déan cinnte do nithe ar iasacht a athnuachan nó a thabhairt ar ais ar an dáta nó roimh an dáta ar a bhfuil siad le tabhairt ar ais. Cuimhnigh, áfach, gur féidir leat fós nithe atá deireanach a athnuachan chun a thuilleadh fíneálacha a sheachaint.

Seirbhísí, Imeachtaí & Gníomhaíochtaí

Is iomaí imeacht agus gníomhaíocht a bhíonn ar siúl sna Leabharlanna ar feadh na bliana agus bíonn siad dírithe ar na haoisghrúpaí go léir agus tarraingteach dóibh. Ach oiread leis na féilte bliantúla náisiúnta cosúil le Bealtaine agus Saoire, is iomaí gníomhaíocht a bhíonn ar siúl i rith na seachtaine nó na míosa i ngach ceann de na Leabharlanna brainse chomh maith.

Cumainn Leabhar

Tá cumann gníomhach leabhar, do dhaoine fásta, i ngach ceann de na leabharlanna brainse. Cruinníonn na cumainn gach mí agus is iad na baill a roghnaíonn na leabhair i gcónaí. Eagraíonn Leabharlann Stigh Lorgan cumann leabhar Dickens chomh maith agus tá sé sin dírithe go speisialta ar shaothar an údair sin agus eagraíonn Leabharlann Dheilginse cumann leabhar Gaeilge ina bpléitear leabhair Ghaeilge i nGaeilge. Is féidir mionsonraí faoi gach cumann a fháil ag do bhrainse áitiúil ach iad a iarraidh.

Oiliúint ar an Idirlíon

Is féidir oiliúint bhunúsach saor in aisce ar an idirlíon a fháil i ngach leabharlann bhrainse. Más mian leat páirt a ghlacadh sna ranganna seo níl le déanamh ach eolas a iarraidh ag an gcuntar eisiúna. Cuimhnigh go mbíonn an-tóir ar na cúrsaí seo agus iarrtar ort iad a chur in áirithe go maith roimh an am.

Seomraí ceoil

Tá dhá sheomra cheoil i Leabharlann Dheilginse ina bhfuil pianó agus cláirseach agus is féidir leis an bpobal úsáid a bhaint astu. D'fhéadfaí gléasanna eile ceoil a thabhairt isteach lena n-úsáid sna seomraí seo; téigh i dteagmháil leis an bhfoireann le do thoil. Bíonn na seisiúin ar siúl ar feadh uair an chloig agus moltar seomra a chur in áirithe roimh ré.

Seisiúin mhalartacha teanga

Bíonn seisiúin Mhalartacha Teanga ar siúl i roinnt leabharlann inar féidir le daoine a scileanna a chleachtadh sa dara teanga ar bhealach neamhfhoirmiúil.

Scéalaíocht

Bíonn seisiúin scéalaíochta ar siúl do leanaí óga i roinnt leabharlann. Is iondúil go mbíonn siad ar siúl lá sa tseachtain ar feadh leathuair an chloig nó mar sin ó Mheán Fómhair go Meitheamh. Is baill foirne nó daoine deonacha as an bpobal áitiúil iad na scéalaithe go léir a bhíonn againn.

Taispeántais

Taispeántar taispeántais de líon éagsúil de na cineálacha ealaíon go léir le healaíontóirí áitiúla, náisiúnta agus idirnáisiúnta go rialta sna leabharlanna brainse. Athraítear na taispeántais ó shéasúr go séasúr agus bogtar iad ó bhrainse go brainse.

Comórtais

Eagraíonn Leabharlanna Dhún Laoghaire-Ráth an Dúin comórtais a bhíonn saor in aisce agus a tharlaíonn go rialta; áirítear gach uile shórt ó mhaidineacha tráth na gceist go comórtais ghrianghrafadóireachta agus ealaíne go féilte filíochta ar shamplaí de chomórtais a bhí ar siúl go dtí seo. Fógrófar na comórtais sin i mbrainsí de réir mar a bheidh siad ann.

Stair Áitiúil

Coinnítear bailiúchán de stair áitiúil Dhún Laoghaire-Ráth an Dúin i Leabharlann Dhún Laoghaire. Coinnítear ábhar ann a bhaineann leis an gcontae agus a limistéar máguaird, agus áirítear leabhair, eolairí, grianghraif, léarscáileanna, tréimhseacháin agus daonáirimh, agus acmhainní atá ar mhicreascannán agus ar dhlúthdhioscaí, leis. Glaoigh, seol ríomhphost nó glaoigh isteach chuig Leabharlanna Dhún Laoghaire má bhíonn taighde staire á dhéanamh agat nó má bhíonn ceist agat faoin gceantar áitiúil.

Grúpa Amharclannaíochta Dhún Laoghaire

Tagann an Grúpa Amharclannaíochta le chéile i leabharlann Dhún Laoghaire, ar maidin, ar an dara Sathairn de gach mí.

Grúpaí Scríbhneoirí

Buaileann grúpaí scríbhneoirí gníomhacha lena chéile i Leabharlanna Dhún Droma, Dheilginse agus Ghráinseach an Déin chun a saothair féin a léamh agus a phlé. Má bhíonn a thuilleadh eolais uait níl le déanamh ach dul i dteagmháil leis na brainsí sin.

Cluichí Boird

Bíonn cumainn fichille agus cumainn chluichí do dhaoine óga ar siúl i roinnt mhaith de na brainsí; cuir ceist ar bhall foirne de do leabharlann áitiúil chun eolas a fháil faoi na cumainn atá in aice leatsa. Bíonn cumann Scrabble ar siúl do dhaoine fásta i leabharlann Dhún Droma gach dara hAoine chomh maith.

Club Cúpla Focal

An dtaitníonn an Ghaeilge leat? Ar mhaith leat deis labhartha le daoine cosúil leat i suíomh neamhfhoirmiúil? Buail isteach agus labhair le daoine a bheadh ar aon intinn leat i leabharlann Dhún Droma gach Luan ó 11.00 r.n. go 12.00 i.n. Is féidir a thuilleadh eolais a fháil ó Chaitríona ar 2955410 nó ón leabharlann ar 2985000.

Seirbhís Bhaile ó Leabharlanna

Cuirtear an tseirbhís seo ar fáil as Leabharlanna na Carraige Duibhe agus Stigh Lorgan agus tugann siad cuairt rialta ar dhaoine nach mbíonn ar a gcumas dul chomh fada leis na leabharlanna. Teitear chomh fada leis an duine aonair ina theach nó ina teach féin, nó sa teach altranais, le rogha de leabhair, dlúthdhioscaí, caiséid, agus araile. Is féidir ceist a chur faoin tseirbhís seo ag ceachtar den dá leabharlann.

Leabharlann Ar Líne
Rochtain Idirlín

Cuireann Leabharlanna Dhún Laoghaire - Ráth an Dúin rochtain phoiblí saor in aisce ar an idirlíon ar fáil. Is féidir dul isteach saor in aisce ar an idirlíon gan sreang i ngach ceann de na leabharlanna brainse anois chomh maith. Tabhair faoi deara, le do thoil, go mbíonn an rochtain go léir ar an idirlíon faoi réir théarmaí agus choinníollacha na seirbhíse leabharlainne. Is féidir doiciméid a phriontáil de ríomhairí na leabharlainne agus gearrtar táille in aghaidh an leathanaigh. Is féidir ríomhaire a iarraidh chomh maith ar a mbeadh gnéithe inrochtaineachta cosúil le scáileán mór agus bogearraí téacs go teanga.

Suíomh Gréasáin na Leabharlainne

Is féidir an chatalóg a chuardach, leabhair agus meáin eile a chur in áirithe lena mbailiú ag do bhrainse áitiúil, d'iasachtaí reatha a athnuachan agus dul isteach ar do chuntas ar líne le d'uimhir aitheantais phearsanta ar an suíomh gréasáin www.dlrcoco.ie. Bealach isteach chuig iliomad acmhainní ar líne is ea an suíomh gréasáin. Faigh amach faoina bhfuil ag tarlú i do leabharlann áitiúil trí chliceáil ar Nuacht agus Imeachtaí, éist le podchraoladh d'ócáidí cultúrtha na leabharlainne agus léigh nó scríobh léirmheasanna ar leabhair. Tá stór mór de naisc fhiúntacha ar an suíomh lena n-áirítear Brittanica ar líne agus bunachair acmhainne eile agus tá nasc ann chuig www.borrowbooks.ie trína mbeidh tú ábalta catalóga leabharlainne fhormhór na gcontaetha in Éirinn a chuardach.

Stoc Leabharlainne
Leabhair, Tréimhseacháin agus Nuachtáin

Is féidir breis is 400,000 leabhar a fháil ar iasacht sna brainsí. Áirítear ar na leabhair sin leabhair do dhaoine fásta agus do dhaoine óga, leabhair ficsin agus leabhair nach ficsean iad, leabhair i gcló mór agus ábhar litearthachta. Coinnítear tréimhseacháin agus nuachtáin i ngach brainse. Cuireann siad leis an stoc leabhar agus bíonn eolas cothrom le dáta iontu faoi réimsí ginearálta agus réimsí speisialta spéise araon. Is féidir sean-eagráin d'fhormhór na dtréimhseachán a fháil ar iasacht. Bíonn seirbhís Taispeántas na Meán Cumarsáide le fáil i Leabharlanna Dhún Laoghaire-Ráth an Dúin trínar féidir dul isteach saor in aisce ar líne ar bhreis is 600 eagrán iomlán de nuachtáin agus d'irisí as gach cearn den domhan.

Ábhar closamhairc

Bítear ag cur go seasta leis an mbailiúchán DVDanna, Leabhair Thaifeadta, dlúthdhioscaí agus cúrsaí teanga atá againn agus is féidir na nithe sin a fháil ar iasacht as na brainsí go léir. Is féidir iad a fháil ar iasacht díreach mar a dhéanfá le hábhar i gcló; is dhá theideal déag an líon is féidir a fháil san iarraidh ar gach ticéad leabharlainne.

Ábhar Tagartha agus Eolas

Tá rogha de leabhair ar fáil i ngach leabharlann mar ábhar tagartha. Tá líon éagsúil d'fhoirmeacha iarratais ar fáil i ngach brainse chomh maith lena n-áirítear foirmeacha lena n-aghaidh seo - pasanna, ceadúnais tiomána agus clár na dtoghthóirí. Cé gur i Leabharlann Dhún Laoghaire atá an príomhbhailiúchán den Stair Áitiúil, coinnítear roinnt ábhair i ngach brainse ina bhfuil eolas stairiúil a bhaineann go sonrach leis an gceantar áitiúil sin.

Seirbhís Iasachta Idirleabharlann

Is féidir leat teacht ar stoc na leabharlann brainse go léir sa chontae le cárta leabharlainne Dhún Laoghaire-Ráth an Dúin. Is féidir ní atá i mbrainse eile a ordú ach iarratas a dhéanamh; gearrtar táille 50c an ceann as nithe a chur in áirithe. Agus is féidir teidil a chuardach níos faide ó bhaile in Éirinn agus sa Bhreatain ar an táille chéanna tríd an tSeirbhís Iasachta Idirleabharlann. Is féidir leabhair as cló, ailt in irisí agus nithe speisialta a fháil ar an mbealach seo.

Féilte Leabharlainne
Bealtaine

Féile náisiúnta ealaíon na hÉireann is ea Bealtaine a cheiliúrann an chruthaitheacht atá i ndaoine breacaosta. Bíonn sí ar siúl ar fud na tíre gach mí Bealtaine agus eagraítear na céadta imeacht de gach cineál ealaíne. Bunaíodh ainm na féile ar an bhféile ársa Cheilteach a cheiliúir an t-earrach agus ceiliúrann Bealtaine athnuachan, cruthaitheacht agus forás agus daoine ag dul in aois. Is iad Age & Opportunity - an ghníomhaireacht náisiúnta chun rannpháirtíocht daoine breacaosta sa tsochaí a fheabhsú agus a chur chun cinn - a chomhordaíonn Bealtaine. Bíonn an tseirbhís leabharlainne rannpháirteach gach bliain agus eagraíonn siad sraith cainteanna agus gníomhaíochtaí - cuairteanna ó údair agus ceardlanna ina measc sin.

Glór na Leabharlainne

Sraith dhébhliantúil de chainteanna le húdair náisiúnta agus idirnáisiúnta agus daoine mór le rá i gcúrsaí litríochta atá anseo. Is fada agus is saibhir an traidisiún de chláir chultúrtha atá ag an tseirbhís leabharlainne agus is cuid den mhisean atá againn - údair chlúiteacha litríochta a chur os comhair an phobail - a bhíonn i gceist leis an tsraith seo de chainteanna.

Leabhair sa Pháirc

Is tionscnamh a eagraíonn seirbhísí leabharlainne agus páirceanna Chomhairle Contae Dhún Laoghaire-Ráth an Dúin i dteannta a chéile é an tionscnamh seo. Tugtar cuireadh d'údair saothair litríochta do dhaoine fásta agus do leanaí giotaí saothair a léamh ag imeacht faoin aer i gceann de pháirceanna Dhún Laoghaire-Ráth an Dúin. Bíonn fáilte roimh chách ag na léitheoireachtaí seo agus is lá spraoi a bhíonn ann don chlann go léir ó tharla gur iomaí taispeántas eile a bhíonn ar siúl amhail péintéireacht aghaidhe, lámhchleasaithe agus siúlóirí ar chosa croise. Is féidir leat éisteacht le podchraoladh d'imeachtaí a bhí ar siúl roimhe seo tríd an nasc podchraolta a leanúint ar an suíomh gréasáin atá againn www.dlrcoco.ie/library.