WELSH
CATEGORY
Y Cwymp
Yng Nghenarth
Mae hi’n
llifo’n llydan trwy hafau Tre Wen,
mor osgeiddig â thywysoges
yn bwrw'i phrynhawn yn ei pherllan;
ar waelod y dyffryn, hi yw brenhines
y tirwedd teg rhwng Maenor Deifi a’r môr,
cyn i’r llanw greu crych ar ei chroen.
Yng Nghenarth, mae pethau’n wahanol;
ei gwasgu drwy gulni rhigol,
ei thasgu o graig i graig
a’i thaflu’n ddidostur i gwter.
Uwchben y dwr trwblus cofiais am un.
Aeth heibio’i Thre Wen cyn fy ngeni;
wyddwn i ddim am ei Chenarth
nes ei bod hi’n rhy hwyr;
ond fe’i gwelais yn nhegwch ei Maenor Deifi
cyn iddi fynd i gwrdd â llanw’r môr.
T.
James Jones (1st Prize, Adult)
back
Tusw o arswyd
Yn gwlychu’n y glaw
A thusw o ddagrau
Yn boddi’n y baw.
Tusw o gariad
Yn tywynnu’ n yr haul
A thusw o golled
Yn gorwedd mewn tail.
Tusw o gusan
Yn cuddio yn y niwl
A thusw o goflaid
Yn marw......
A’r ceir yn dal i ruthro heibio’r foment
A’r gofeb o flodau wedi gwywo
A’r ceir yn dal i ruthro ...
A’r selophen yn crio
A’r ceir yn dal i ruthro heibio.
Gwen
Lasarus James (2nd Prize, Adult)
back
Nhad
gartre,
A’r lle yn llawn
O ymwelwyr am alw heibio
I ddymuno’n dda
A llwyr wellhad;
Y tebot croeso’n
Tywallt gwerthfawrogiad Mam,
Tra minnau’n damio
Eu haros
A’r cinio’n oeri ...
“O Dad, yn deulu dedwydd ...”
Glafoerais y geiriau
Dan gil-lygadu’n slei
Bob dim a ddoi’n bryd imi ...
“Ein lluniaeth a’n llawenydd.”
Ameniais
A sgythru am y wledd o ‘mlaen
Fel tasai ddim fory i fod ...
Heb wybod
Fod wrth y bwrdd
Ymwelydd na wnes mo’i weled
Wedi galw heibio fy nhad,
Ac yn gwledda,
Yn ei fwyta
Fo’n fyw.
Rhys
Dafis (3rd Prize, Adult)
back
Chwydfa!
poets ar y traeth
pluen wen fel gewyn.
Halen a chregyn arni
-maneg Tsieini.
Rhwyd fel fflamau’r tân
a phriciau mân.
Braich hen wr
mewn pwll o ddwr.
Sandal wedi’i chnoi
yn ysu am ffrind bach.
Neidr o raff
o gwmpas preniach.
Gwymon a rhaff
fel dau gariad ynghlwm.
Wyneb gwythiennog ar ddarn o bren
gogr yn ysu.
Potel wedi chwysu.
Bysedd gwrach o frigau
a chregin yn cael strach.
Poer y môr
ar frôc.
Chwydfa Neigwl ...
Llyr
Titus Hughes (1st Prize, Under 17)
