PREASRÁITEAS

 

TORTHAÍ FHÉILE FILÍOCHTA 2004

 

Tá torthaí an 16ú Féile Filíochta Bliantúil ar fáil anois! Fuaireamar 6,076 dán i 9 dteanga agus tá buaiteoirí againn ó gach cearn den domhan: an Astráil, SAM, an Ghearmáin, an Ostair, an Fhrainc, an Iodáil, an Spáinn, Albain, an Bhreatain Bheag, Sasana, an tSualainn agus ar ndóigh Éire féin. Tá na dánta go léir a bhuaigh le léamh ar www.dircoco.ie/library anois.

 

Ba mhór againn méadú mór a fheiceáil ar uimhir na ndánta i ngach catagóir Gaeilge i mbliana i gcomparáid le blianta eile. Fuarthas a dhá oiread dánta Gaeilge i mbliana le anuraidh nach mór. Bhain Ciarán Mac Aibhistín ó Bhéal Feirste an chéad duais i gcatagóir na nAosach don dán Clog na Gréine. Eisean a bhuann Buantrófaí Chonradh na Gaeilge. Bhí Áine Ní Ghlinn as Baile Átha Cliath sa dara háit le Eadarlúid agus Máirín Mhig Fhionnbharra, as Baile Átha Cliath freisin, sa tríú háit le Uisce. Sa chatagóir Faoi 17, bhain Niamh Seoighe ó Choláiste Cholmcille i nGaillimh an chéad duais agus Buantrófaí Chonradh na Gaeilge do An Ghealach. B'í Alex Kennedy a bhain an dara duais don dán Cinnteacht agus Aisling Ní Mhórdha an tríú duais le haghaidh An Lá Sin. Sa chatagóir deiridh, Faoi 12, bronnadh an chéad duais ar Dhearbhla Ní Mhórdha ó Scoil Aonghusa, Geata an Domhnaigh i nDroichead Átha dá dán Lá Amháin. Bhí Seán Mac Dhonnagáin sa dara háit leis An Seomra agus Áine Ní Fhlanagáin ó Charraig Mhachaire Rois sa tríú háit leis An t-am.

 

I mbliana ar mhaithe le haiseolas níos fearr a thabhairt dár bhfilí óga a ghlac páirt sa bhFéile Filíochta, roghnaíodh deichniúr tánaistí eile sna catagóirí Faoi 17 agus Faoi 12 le teastais a fháil. Tá a n-ainmneacha siúd le léamh ar an láithreán gréasáin againne ar leathanach na mbuaiteoirí duaise.

 

Is mór againn a fhógairt gur bhain iontráil ón mBreatain Bheag, Cartref le Tony Banchi, Gradam Dhán na hEorpa, mórdhuais na Féile Filíochta.  Is í L'Assemblée des Regions d'Europe a bhronnann an trófaí seo don dán is suaithinsí i gCatagóir na nAosach. Tá tuilleadh faoi Tony and an dán a bhuaigh, i mBreatnais agus i mBéarla, le léamh ar an láithreán gréasáin againne.

 

Ceiliúrfar na dánta a bhuaigh i bhFéile Filíochta 2004 i Halla an Chontae, Dún Laoghaire, Dé hAoine an 1ú Aibreán. Beidh ticéil ar fáil ón 1ú Márta ó Marian Keyes, Leabharlannaí Sinsearach (Cultúr) ag (01) 278 1788 nó ríomphost mkeyes@dircoco.ie Beidh an ceiliúradh seo ar siúl ag an am céanna agus Poetry Now Festival de chuid Dún Laoghaire-Ráth an Dúin (PN05) a bheas ann idir 31ú Márta-3ú Aibreán 2005 agus atá á eagrú ag Oifig Ealaíon na Comhairle Contae. Féadfar an t-eolas go léir i dtaobh Poetry Now a fháil ach ríomhphost a chur chuig arts@dircoco.ie ref; Poetry Now nó glao a chur ar (01) 205 4873.

 

Gabhaimid buíochas lenár moltóirí agus lenár n-urraithe go léir as a gcuid saineolais agus tacaíochta agus gabhaimid buíochas ar leith leis na haosaigh, déagóirí agus páistí iomadúla a chuir isteach ar an gcomórtas uathúil seo.

 

Láinseálfar an 17ú Féile Filíochta go luath i mí an Mheithimh 2005.